ଅଳପ

ଅଳପ କଥାରେ ମନ କିଣିହୁଏ ଅଭୁଲା ରହେ ସେ ମନେ,

ଅଳପ ହସରେ ଅକୁହା କଥା ବି କହିଦିଏ ପ୍ରେମୀ ଜଣେ |

ଅଳପ ରଙ୍ଗରେ ଇନ୍ଦ୍ରଧନୁ ଆଂକେ ଆକାଶରେ କଳା ମେଘ,

ଅଳପ ବରଷା ପୁଲକିତ କରେ ଦିଏ ନୂଆ ଅନୁଭବ |

ଅଳପ ଆଲୋକ ଅନ୍ଧକାର ନାଶେ ଅଳପ ଦିଶଇ ତାରା,

ଅଳପ ଲୁଣରେ ସୁଆଦିଆ ହୁଏ ତରକାରୀ ଖଟା ବରା |

ଅଳପ ମଣିଷ ନିଜ କଥା ଭୁଲି ଦେଶକୁ କରନ୍ତି ପ୍ରେମ,

ଅଳପ ଔଷଧ ରୋଗ ଦୂର କରେ ଅତି ବୁଦ୍ଧି କରେ ଭ୍ରମ |

ଅଳ୍ପ ଧନରେ ଚଳିହୁଏ ସିନା ଜାଣିଥିଲେ କଉଶଳ,

ଅଳପ ଦାନରେ ବଡ଼ କାମ ହୁଏ ମିଳେ ବେଶି ପୁଣ୍ୟଫଳ |

ଅଳପ ଅଳପ ସଞ୍ଚୟ କରିଲେ ଭଣ୍ଡାର ବି ପୂରିଥାଏ,

ଅଳପ ଟିକିଏ ମଥା ନଇଁଦେଲେ ବିପଦ ବି ଟଳିଯାଏ |

 

ଅଳପ ଖାଇଲେ ଆୟୁ ବୃଦ୍ଧି ହୁଏ ଶରୀର ନିରୋଗ ରହେ,

ଅଳପ ଅଳପ ଚାଲି ଯାଉଥିଲେ ବାଟ ସରିସରି ଯାଏ |

ଅଳପ ଅଳପ ପଢି ଚାଲିଥିଲେ ବଡ଼ ବହି ପଢ଼ି ହୁଏ,

ଅଳପ ଅଳପ କାମ କରୁଥିଲେ ବଡ଼ କାମ ହୋଇଯାଏ |