ଅକ୍ଷୟ ତୃତୀୟା

ବୈଶାଖ ମାସର ଶୁକ୍ଳ ତୃତୀୟା ଦିନକୁ

ଅକ୍ଷୟ ତୃତୀୟା କହି ଲାଗୁ ପାଳିବାକୁ ॥

ବାରମାସେ ତେର ପର୍ବ ଜାତ ମଉଛବ

ଅକ୍ଷୟ ତୃତୀୟା ଅଟେ ଯେ ଶ୍ରେଷ୍ଠ ଉତ୍ସବ ॥

ସବୁଠାରୁ ଶୁଭ ବେଳା ଅକ୍ଷୟ ତୃତୀୟା

ଶୁଭ କାମ ଅନୁକୁଳ କରି ନାନା ପୂଜା ॥

ମନାସନ୍ତି ଈଷ୍ଟ ପାଦେ ଖଣ୍ତିବାକୁ ରିଷ୍ଟ

ଅକ୍ଷୟ ତୃତୀୟା ପର୍ବ ଆହା କି ! ଉତ୍କୃଷ୍ଟ ॥

ପୂଣ୍ୟମୟୀ ପୂତ‐ତିଥି ଶୁଭ ମୁହୂର୍ତ୍ତର

ମାଙ୍ଗଳିକ କାର୍ଯ୍ୟ ପାଇଁ ଯା ପ୍ରକୃଷ୍ଟତର ॥

ସାଂସ୍କୃତିକ ମହାନତା ଜାତୀୟ ଐତିହ୍ୟ

ପ୍ରକାଶେ ସତତ ଯାହା ଅଟଇ ସହାୟ ॥

ବିବାହ ବ୍ରତାଦି ନାନା ଶୁଭ କାର୍ଯ୍ୟ ଲାଗି

ଶୁଭକ୍ଷଣେ ଏହି ଦିନେ ପାଳି ଥାଉ ବେଗି ॥

ଗୃହପ୍ରତିଷ୍ଠାଦି ପୁଣି ପିଲାଙ୍କର ପାଇଁ

ମାଙ୍ଗଳିକ କାର୍ଯ୍ୟକ୍ରମ ଥାଉ ଆପଣାଇ ॥

ମାତା ଲକ୍ଷ୍ମୀଙ୍କର ପ୍ରିୟ ଯେତେ ଅନୁଷ୍ଠାନ

ସକଳ ପାଳିତ ହୋଇ ଥାଏ ଏହି ଦିନ ॥

କୃଷକଙ୍କ ପାଇଁ କେତେ ଆନନ୍ଦଦାୟକ

ଅକ୍ଷିମୁଠି ଅନୁକୂଳ ଚାଷୀ ଓ କୃଷକ ॥

କରି ଆପଣାର ଜମିରେ ଶୁଭ ମନାସିଣ

ଚାଷ କାମ ଆରମ୍ଭନ୍ତି ସର୍ବେ ଏହି ଦିନ ॥

ଏହି ଦିନ ପୂଜା କଲେ ମିଳେ ଭଲ ଫଳ

ନାନା ଦୁର୍ବିପାକୁ ରକ୍ଷା ହୁଅଇ ଫସଲ ॥

ଜଗନ୍ନାଥଙ୍କର ରଥ ନିରିମାଣ କାର୍ଯ୍ୟ

ଏହି ଦିନ ଠାରୁ ଶୁଭେ ହୁଅଇ ପ୍ରାରମ୍ଭ ॥

ଚାଷୀଏ ପୂଜନ୍ତି ଘରେ ଧାନ ଓ ବିହନ

କଠା  ଗଉଣୀ ଇତ୍ୟାଦି ଶୁଭ ଦେଇ ଜାଣ ॥

ନାନା ସ୍ଥାନେ ନାନା ଭାବେ ପୂଜନ ଉତ୍ସବ

ଜନ‐ସମାଜରେ ଦୃଢ କରଇ ସଦ୍ଭାବ ॥

ଚନ୍ଦନ ଯାତରା ଏହି ଦିନଠୁ ଆରମ୍ଭ

ଗ୍ରାମେ ଗ୍ରାମେ ଯାତ ହୁଏ କେତେ ଅଭିନବ ॥

ସାଂସ୍କୃତିକ ଭାବ ‐ମାଧୁରୀ ଭରା ଉତ୍ସବ

ଅକ୍ଷୟ ତୃତୀୟା ପାଳନ୍ତି ପୂଣ୍ୟ ସଦ୍ଭାବ ॥

ଜଗରଣ ପାଇଁ ପିଠା ପଣା ନାନା ଦ୍ରବ୍ୟେ

ଆନନ୍ଦ ମନାନ୍ତି କରି ଜନେ ଯେ ସରବେ ॥

ପ୍ରତି ଶୁଭ କର୍ମେ ରତ ଜନେ ଆନନ୍ଦରେ

ଅକ୍ଷୟ ତୃତୀୟା ଏହି ପୂଣ୍ୟ ପରବରେ ॥

ସଞ୍ଚାରେ ସବୁରି ମନେ ଆନନ୍ଦ ପ୍ଲାବନ

ସୁଖ ତପ୍ତି ହରଷରେ ଭରେ ଏହି ଦିନ ॥