ଝରା ପତ୍ରର ମର୍ମର

ସକାଳ ପାହିଲେ ତୁମ ଭାବନାରେ

ସୂରୁଜ ଆସଇ ଉଇଁ

ତୁମ ରୂପ ଯେବେ ମନ ତଳେ ନାଚେ

ଆଖିପତା ଯାଏ ନଇଁ I

ତୁମକୁ ଦେଖିଲେ ହୃଦୟ ବେଳାରେ

ମଥାପିଟେ ପ୍ରୀତି ଉର୍ମି

ତୁମରି ହସରେ ଆକାଶ ଚହଲେ

ମନ ମୋର ଯାଏ ଝୁମି I

ଆକାଶରେ ଭାସେ ଚୁନା ଚୁନା ମେଘ

ନଈରେ ଭାସଇ ନାଆ

ଦିଶିଗଲେ ତୁମ ମୋହିନୀ ରୂପଲୋ

ଛାତିତଳେ ଜଳେ ନିଆଁ I

ପକ୍ଷୀ ଉଡୁଥାଏ ଖୋଲା ଆକାଶରେ

ମୋ ମନ ଆକାଶେ ତୁମେ

ଖେଳି ବୁଲୁଥାଅ ପ୍ରତି ମୂହୂର୍ତ୍ତରେ

ମନ ଭରିଯାଏ ପ୍ରେମେ I

ପାଚିଲା ପତର ଝଡିବା ପାଇଁକି

ହେଉଥାଏ ସଜବାଜ

ତୁମ ସହ ଥିଲେ ସମୟ ସରେନି

ଧିରେ ନଇଁ ଆସେ ସଞ୍ଜ ।