କଥା କହୁଥିବା ଛବି

କେଉଁଠୁ ଆରମ୍ଭ ହେଲା ମୋର ଯାତ୍ରା

ଜାଣିନି ମୁଁ ସଖୀ ଜାଣିନାହିଁ

ଆଗକୁ ଆଗକୁ ବାଟ ମୁଁ ଚାଲିଛି

ଏଯାଏଁ ବି ପାଦ ଥକିନାହିଁ I

ହାତ ମୋର ଅଛି ତୁମ ହାତେ ସଖୀ

ତୁମ ପାଦେ ପାଦ ମିଶାଉଛି

ଯୁଆଡେ ଚାହୁଁଛି ସିଆଡେ ଗୋ ଖାଲି

ତୁମ ଛବି ଗୋଟି ଦିଶୁଅଛି I

ତୁମେ ଆଲୋକର ତୀର୍ଯ୍ୟକ କଣିକା

ହୃଦୟକୁ ମୋର ଭେଦିଗଲ

ଜାଣି ପାରିଲିନି କେଉଁଦିନ ତୁମେ

ଆଖିତଳେ ମୋର ବସା କଲ I

ତୁମକୁ ଦେଖିଲି ନୀଳ ନିରିଜନେ

ଆଙ୍କିଲି ତୁମର ଛବିଟିଏ

ନିର୍ଜୀବ ନଥିଲା ସେ ଛବି ଲୋ ସଖୀ

ନିତି ମୋ ସହିତ କଥାହୁଏ I

ସେଇ ଛବି ଆଉ ତୁମରି ଭିତରେ

ପ୍ରଭେଦ ମୁଁ କିଛି ଦେଖିନାହିଁ

ତୁମ ହାତଧରି ଚାଲୁଛି ମୁଁ ବାଟ

ବାଟ ମୋ ଏଯାଏଁ ସରିନାହିଁ I

ଜନ୍ମ ଜନ୍ମାନ୍ତର ତୁମରି ହାତକୁ

ଧରି ରଖିଥିବି ହାତେ ମୋର

ତୁମରି ପ୍ରୀତିର ପିୟୁଷକୁ ପିଇ

ବାଟ ଚାଲୁଥିବି ନିରନ୍ତର ।