ଐକାନ୍ତିକ ଇଚ୍ଛା

ଫୁଟିକି ଥାଆନ୍ତି ତୁମ ବଗିଚାରେ,

       ଗୋଲାପଟିଏ ମୁଁ ହୋଇ ।

ଅତି ଯତନରେ ଛିଡା଼ଇ ନିଅନ୍ତ,

       ଜୂଡାରେ ଖୋସିବା ପାଇଁ ।।

ଜୂଡାରେ ରହି ମୁଁ ତୁମ ସୌରଭକୁ,

         ଆଘ୍ରାଣ କରନ୍ତି ନିତି ।

ତୁମ ପାଶେ ରହି ଜୀବନ ମୋହର,

         ଖୁସିରେ ଯାଆନ୍ତା ବିତି ।।

କେବେ କେଉଁଦିନ ମନ ମୋର ଚାହେଁ,

                 ଥାଆନ୍ତା କି ପକ୍ଷ ଦୁଇ ।

ଉଡି ମୁଁ ଯାଆନ୍ତି ତୁମ ପାଶେ ନିତି,

               ତୁମକୁ ଦେଖିବା ପାଇଁ ।।

କି କରିବି କିନ୍ତୁ ମଣିଷର ଇଚ୍ଛା,

          ନଥାଏ ନିଜ ଆୟତ୍ତେ ।

ଅଭାଗାଟିଏ ମୁଁ ଇଚ୍ଛା କଲେ କିବା,

         ଭାଗ୍ୟବାନ ହେବି ସତେ ?

ଯେବେ ନିରୋଳାରେ ଆଖି ବୁଜି ଦିଏ,

            ତୁମ ଛବି ଚାଲି ଆସେ ।

ନିଟୋଳ ନୟନେ ଚାହିଁ ରହି ମୋତେ,

           ବସି ଯାଅ ମୋର ପାଶେ ।।

 ଭାବେ ମୁଁ ବାସ୍ତବେ ତୁମେ ଆସିଅଛ,

          ମୋ ମନର କଥା ଜାଣି ।

ହେଲେ ମୁଁ ବୁଝେନି ସତ କି ହୋଇବ,

              ଦିବସର ସ୍ୱପ୍ନ ପୁଣି ?