ହୃଦୟ ଗୀତି

ହୃଦୟ କ୍ଷେତରେ ଦେଇଅଛ ତୁମେ

ଯେଉଁ ମଞ୍ଜିତକ ବିଞ୍ଚି,

ଅଙ୍କୁରିତ ହେବ ଦେଲେ ଥରେ ତାରେ,

ପ୍ରେମ ବାରି ଟିକେ ସିଞ୍ଚି ।

ଜାଣେନା ମୁଁ କେବେ ଆସିବ ବଉଦ,

ଢାଳିବ ବରଷା ଧାରା,

ଅଙ୍କୁରିତ ଚାରା ବୃକ୍ଷ ପାଲଟିବ,

ମାରିବ ପତ୍ର ଗଜରା ।

ଚାହିଁ ରହିଅଛି ବସନ୍ତ ଋତୁକୁ,

ଯେବେ ମଳୟ ବହିବ,

ମନେ ଅଛି ମୋର ଯେତେ ଆଶା ସବୁ,

ସତେ କି ପୂରଣ ହେବ ?

ପତ୍ର କଅଁଳିବ ଫୁଲ ଯେ ଫୁଟିବ,

ଶାଖାରେ ଧରିବ କଷି,

ମନେ ମନେ ମୁହିଁ ହେଉଛି କି ଗୁଣି,

ମିଛଟାରେ ବସି ବସି ।

ମନ କିନ୍ତୁ କହେ ଘଟିବ ଏ ସବୁ,

ନିଶ୍ଚୟ ଦିନେ ନା ଦିନେ,

ଜାଣେନା ମୁଁ କିନ୍ତୁ ସୁନ୍ଦର ସପନ,

କେବେ ଆସିବ ନୟନେ ।

ତୁମେ ତ ଚାହିଁଲେ ସବୁ କିଛି ହେବ,

ହୃଦୟ ତୃଷ୍ନା ମେଣ୍ଟିବ,

ଚାଲି ଆସ ଥରେ ମୋର ଦୁନିଆକୁ,

ଅପେକ୍ଷା ଘଡି ତୁଟିବ ।