ଅଗିରା ପୂର୍ଣ୍ଣମୀ
ଅଗିରା ପୂର୍ଣ୍ଣମୀ
ଉତ୍କଳ ମାଟିରେ ପରବପର୍ବାଣି
ପ୍ରତି ଅଗଣାର ସାଜେ ବିଭବ
ଗୋଟେ ପରେ ଗୋଟେ ଝୁଲିଝୁଲି ଆସେ
ମାଘ ପୂର୍ଣ୍ଣିମାରେ ଅଗ୍ନି ଉତ୍ସବ ।
ସ୍ଥିରୀକୃତ ଥିବା ଗୋଟିଏ ସ୍ଥାନରେ
ଗାଁ ଲୋକମାନେ ମିଳିତ ହୋଇ
ଅଗି ତିଆରନ୍ତି ଛଣ, ଅଗିରାରେ
ଅଗିରା ପୂର୍ଣ୍ଣମୀ ନାମଟି କହି ।
ବ୍ରାହ୍ମଣ ହସ୍ତରେ ବିଧିବିଧାନରେ
ଅର୍ପି ପୂଜାକର୍ମେ ଦୀପ, ନୈବେଦ୍ୟ
ଜଳାଇ ଅଗ୍ନିକୁ ନିଅନ୍ତି ସରବେ
ବାଇଗଣ ପୋଡ଼ିବାର ଆନନ୍ଦ ।
ସତେ କି ଅଗ୍ନିରେ ହୋଇଯାଏ ଦାହ
ଯେତେ କୁଭାବନା ସକଳ ମନୁ
ବିଞ୍ଚି ଦେଇଥାନ୍ତି ଅଗି ପାଉଁଶକୁ
ନିଜ ନିଜ ଗୃହ ଅଗଣା ତନୁ ।
ଅଗି ବାଇଗଣ ଖାଇନ୍ତି ଖୁସିରେ
ପ୍ରତି ପରିବାର ବିନା ଲୁଣରେ
କାଛୁ କି କୁଣ୍ଡିଆ ଦେହଠାରୁ ଦୂର
ବିଶ୍ବାସ ରହିଛି ପରା ମନରେ ।
ଗାଆଁ ଝିଅମାନେ ଅଗି ପହଁରନ୍ତି
ସିନ୍ଦୂରା ଫାଟିବା ପୂର୍ବରୁ ମିଶି
ଲିପାଲିପି ସାରି ନଦୀ, ସରସୀରେ
ସ୍ନାନ ପରେ ଅଗି ପୂଜାର ଖୁସି ।
ଯୋରନ୍ଦା ମେଳାରେ ଭକ୍ତ ସମାଗମ
ଭାବଭକ୍ତି ରସ ପଡେ ଉଛୁଳି
ମହିମା ଧର୍ମର ସନ୍ନ୍ୟାସୀଏ ମୁଖେ
ଥାନ୍ତି ଅଲେଖ ନିରଞ୍ଜନ ବୋଳି ।
ଜଗତର ନାଥ ଆମ ଜଗନ୍ନାଥ
ପାଳି ନାନା ପର୍ବ ମହକୁଥାଇ
ଆମର ପରବ ଅଖଣ୍ଡ ଗୌରବ
ଗରିମାକୁ ନିତି ଥାଏ ବଢ଼ାଇ ।।