ଅଧାରାତିର ସାଥୀ
ଅଧାରାତିର ସାଥୀ
ସଂସାର ଜଞ୍ଜାଳେ ହେଉଛି ମୁଁ ଘାଣ୍ଟି
କେବେ ଖୁସି କେବେ ଦୁଃଖୀ
ବିତି ସାରିଲାଣି ଅଧାରୁ ଅଧିକ
ରହିଛି ସମୟ ବାକି ।
ଚାହେଁ ନାହିଁ ଇଚ୍ଛା ନୂଆ ଆଶା ସ୍ବପ୍ନ
ଝରିବାକୁ ମରିବାକୁ
ମରି ମରି ନିତି ଚାହୁଁଛି ଜୀବନ
ସୁଖୀ ହୋଇ ଜୀଇବାକୁ ।
ଜୀବନ ପଥରେ ସରେନାହିଁ ରାସ୍ତା
ଚାଲିବାକୁ ଅଛି ବାକି
କଥା ଦିଅ ସାଥୀ ହରାଇ ସାହସ
ପଡିବାନି କେବେ ଥକି ।
ଆସୁ ଦୁଃଖ ସୁଖ ଝଡ ବାଧାବିଘ୍ନ
ହେବା ଏକମନ ପ୍ରାଣ
ଜୀଇବା ନିମନ୍ତେ କରିବା ସଂଗ୍ରାମ
ଅବିରତ ଅନୁକ୍ଷଣ ।
ତୁମେ ଥିଲେ ସାଥୀ ପାହିଯିବ ରାତି
ହୋଇବ ନୂଆ ସକାଳ
ଧରି ତୁମ ହାତ ଚାଲୁଛି ଚାଲିବି
ଇହପର କାଳକାଳ ।