ଉଡାଅ ଧର୍ମର ଧ୍ବଜା
ଉଡାଅ ଧର୍ମର ଧ୍ବଜା
ମଧୁପୁର ମଥୁରାରେ ପ୍ରବଳ ପ୍ରତାପୀ କଂସ
ଦୁରାଚାରେ ପ୍ରପୀଡିତ ପରଜା ଆକୁଳ
ସଢେ ଅନ୍ଧ କାରାଗାରେ ବୟଃବୃଦ୍ଧ ତାତମାତ
ହସ୍ତପଦେ ବନ୍ଧା ବେଢି ଲୌହର ଶୃଙ୍ଖଳ ।
ବଢୁଅଛି ଗୋପପୁରେ ବିଶାଖା ରୋହିଣୀ ସୁତ
ଯଶୋଦା ନନ୍ଦନ କୃଷ୍ଣ ନନ୍ଦରାଜା ଗୃହେ
ବଧକରି ପୁତନା ଓ ଅଘା ବକା ଶକଟାକୁ
ବଢୁଛନ୍ତି ଦିନୁଦିନେ ଶଶିକଳା ଯେହ୍ନେ ।
ରୁକୁଣା ରଥକୁ ନେଇ ଯାଇଛି ଅକ୍ରୁର ଦୂତ
ଆସିବେ ରାମ ଗୋବିନ୍ଦ ରଙ୍ଗସଭା ଦେଖି
ଲକ୍ଷେଭାର ପଦ୍ମ ନେଇ ଆସିବେ ନନ୍ଦ ରାଜନ
ମାରିବାକୁ ଷଡଯନ୍ତ୍ର ଅଛି ମୁଢ ରଚି ।
ମତ୍ତହସ୍ତୀ କୁବଳୟା ଓଗାଳି ବସିବ ଦ୍ବାର
ଆହ୍ବାନିବେ ମଲ୍ଲଯୁଦ୍ଧେ ମୁଷ୍ଟିକ ଚାଣୁର
ବସି ରତ୍ନ ସିଂହାସନେ ରଙ୍ଗସଭା ମଞ୍ଚେ
କରୁଥିବ ଅଟ୍ଟହାସ୍ଯ ବସି କଂସାସୁର ।
ଆସୁଛନ୍ତି ତେଜୋଦୀପ୍ତ ସଙ୍କର୍ଷଣ ବଳରାମ
ଢଳି ଢଳି ଶ୍ୟାମଘନ ବିଜେ କୃଷ୍ଣଚନ୍ଦ୍ର
ନାଶି ଦର୍ପ କଂସ ଅହଂ ପ୍ରଖର ନିଦାଘ ତାପେ
ବରଷିବେ ସୁଧାନୀର ଏ ସୃଷ୍ଟିକୁ କରିବେ ଉଦ୍ଧାର ।
ଉଡାଅ ଧର୍ମର ଧ୍ବଜା ବିଜୟର ବୈଜୟନ୍ତୀ
ହଳାୟୁଧ ବଳଦେବ ହେ ମହାବିଷୁବ
ସବୁଜ ସୁନ୍ଦର ହେଉ ବସୁଧା ମା ବସୁମତୀ
ଅବତର ଧରାତଳେ ଶ୍ରୀକୃଷ୍ଣ କେଶବ ।