ଅଭୁଲା ମୁହୂର୍ତ୍ତ କିଛି....

ଆଜି ଏହି ନିସ୍ତବ୍ଧ ରାତ୍ରିର ସାଥିରେ 

  ଏକା ଏକା ବସି ଯେବେ ଭାବେ, 

ସେହି ଅଭୁଲା ମୁହୂର୍ତ୍ତ କିଛି କହେ 

  ରହିଛି ତୁନି ହୋଇ, ସତେଜ ଲାଗେ |

ଅନ୍ଧକାର ଘୋଟି ଅଛି, ଦେଖି ପାରୁଛି 

  ଆକାଶର ତାରା ମୋତେ ଆଖି ମାରୁଛି, 

ସତେ ସେହି ଅଭୁଲା ମୁହୂର୍ତ୍ତ କିଛି 

  ସିଏ ଏବେ ସବୁ ଜାଣି ପାରିଛି |

କେମିତି କହିବି ଏବେ ତାକୁ ଭାବୁଛି 

   ଅତୀତର ସେହି ଖଟା ମିଠା କଥା, 

ସେହି ଅଭୁଲା ମୁହୂର୍ତ୍ତ କିଛି ଏବେ 

   ହୋଇଛି ମୋର ଅତୀତର ଖାଲି ସ୍ମୃତିରେଖା |

ଯେବେ ମନେ ପଡ଼ିଯାଏ ସେଥିରୁ କିଛି 

   ଫେରିଯାଏ, ଭାବେ ମୋର ସେହି ଯୌବନକୁ, 

ଅଭୁଲା ମୁହୂର୍ତ୍ତ କିଛି ସିଏ ପରା 

  ରହିଛି ମାନସରେ, କେମିତି ଭୁଲିବି ତାକୁ ?

ସେହି ନୂଆ ନୂଆ ସ୍ବପ୍ନ ସବୁ 

  କରିଥିଲା ସତେ ଅବା କେତେ ପାଗଳ, 

ହୋଇଯିବ ଅଭୁଲା ମୁହୂର୍ତ୍ତ କିଛି ସିଏ 

  ଭାବିବାକୁ ସେବେ କେବେ ନଥିଲା ବେଳ |

ଭଲପାଇବାର ସେହି ନୂଆ ନୂଆ ନିଶା 

  ଦେଉଥିଲା ପ୍ରେମ ମଦିରା କିଛି ଉନ୍ମାଦନା, 

ସେହି ଅଭୁଲା ମୁହୂର୍ତ୍ତ କିଛି ପଚାରୁଛି 

  କିଏ କାହା ସଙ୍ଗେ କରୁଥିଲା ଛଳନା |

ସେହି ନିଶାରେ ଥିଲା ସୁନ୍ଦର ଭାବନା 

  ଭୁଲିଥିଲି ନିଜ ସ୍ୱାର୍ଥ ସମୂହଙ୍କ ପାଇଁ, 

ଅଭୁଲା ମୁହୂର୍ତ୍ତ କିଛି ସେହି ସାକ୍ଷୀ 

  ଲଢୁଥିଲି ମିଥ୍ୟା କପଟ ସଙ୍ଗେ ଏକାହୋଇ |

ସେଥିପାଇଁ ପାଇଲି ଖାଲି ମିଥ୍ୟା ଦଣ୍ଡ 

   ଅତ୍ୟାଚାର ଶକ୍ତିଶାଳୀ ହୋଇ ଜିତି ଗଲା, 

କହୁଛି ସେହି ଅଭୁଲା ମୁହୂର୍ତ୍ତ କିଛି 

  ଯାହା କିଛି ଖୁସି କଷ୍ଟ ଦେଇଥିଲା |

ତଥାପି ହାରି ନାହିଁ ତ କେବେ 

  ଛାଡି ନାହିଁ କିଛି ସେହି ଭାବନା, 

ଏବେ ସେହି ଅଭୁଲା ମୁହୂର୍ତ୍ତ କିଛି 

  କହୁଛି,ଜଗାଇ ମୋର ସୁପ୍ତ ଚେତନା ।