ଅଭିଶପ୍ତା
ଅଭିଶପ୍ତା
ସବୁ ରକ୍ତ ସମ୍ପର୍କକୁ ଛିନ୍ନ କରି
ତୁମ ନାମେ ପିନ୍ଧିଥିଲି
ଦୁଇପଟ ଶଙ୍ଖା ଆଉ
ଟୋପାଏ ସିନ୍ଦୁର I
ଯେଉଁଦିନ ତୁମ ସହ
ଏରୁଣ୍ଡିବନ୍ଧ ଟପି
ତୁମ ଘରେ ପାଦ ଦେଲି
ସେଦିନ ମୁଁ ଭାବିଥିଲି-
ଏ ଘର ମୋ ଘର ଆଉ
ତୁମେ ମୋର ଚିରଦିନ
ମୁଁ ତୁମ ନିଜର II
ସ୍ୱପ୍ନ ଥିଲା-
ତୁମକୁ ପାଇ ମୁଁ
ଗଢିବି ମୋର ଏକ
ସୁନାର ସଂସାର I
ଶାଶୁ ଶ୍ୱଶୁର ନଣନ୍ଦ
ସଭିଙ୍କୁ ନିଜର କରି
କଟିଯିବ ସୁଖେ ଦିନ ମୋର II
ସଜ ଗୋଲାପଟିଏ ମୁଁ
ଫୁଟିଥିଲି ଏ ଦୁନିଆ ବଗିଚାରେ
କେବଳ ତୁମରି ପାଇଁ I
ହେଲେ ଆଜି ବୃନ୍ତଚ୍ୟୁତ
କ୍ଷତାକ୍ତ ମୋ ପାଖୁଡା ସବୁ
ପଡିଛନ୍ତି ଇତସ୍ତତଃ
ବିଚ୍ଛୁରିତ ହୋଇ II
ତୁମ ପାଇଁ ସମର୍ପିତ
ଥିଲା ଯେଉଁ ଫୁଲ I
କିପରି ଟେକିଦେଲ
ଅନ୍ୟ କାହା ହାତେ
କରି ମୂଲଚାଲ I
ଭୁଲ କରିଥିଲା
ତୁମକୁ ଚିହ୍ନିବାରେ
ମୋର ଦୁଇ ଆଖି I
ଜାଣି ପାରି ନଥିଲି ମୁଁ
ମୋ ଜୀବନ ଆକାଶରେ
ଘୁରି ବୁଲୁଥିଲା ଏକ
କାଳ ବୈଶାଖୀ II
ପଛକୁ ଫେରିବାକୁ
ନଥିଲା ମୋ ବାଟ I
ବେଦନାସିକ୍ତ
ଏ ଜୀବନ ଯାତ୍ରାରେ
ଆଜି ମୁଁ କ୍ଳାନ୍ତ ଆଉ
ହୁଏ ଛଟପଟ II
ନାରୀ ଜନ୍ମ ଏ ସମାଜେ
ଚିରଦିନ କଣ ଅଭିଶପ୍ତ I
ଝୁଣି ଖାଉଥିବେ ତାକୁ
ଏ ଶ୍ୱାନ ଶୃଗାଳ ସବୁ
ହୋଇ ଏକତ୍ରିତ II
******