ମା ଗୋ ସିଂହବାହିନୀ

ଅଶିଣ ଆକାଶେ ଶୋଭପାଏ ଆଜି

ଚନ୍ଦ୍ର ସଙ୍ଗେ ତାରାଫୁଲ

ଧରାବକ୍ଷେ ଆଜି ବହୁଅଛି ମନ୍ଦ

ମନ୍ଦ ସମୀର ଶୀତଳ ॥

ଶୁଭ୍ର କାଶଫୁଲେ ସଜେଇ ହୋଇଛି

ଆଜି ଏ ଧରଣୀ ରାଣୀ

ଜଳେ କ୍ରୀଡାରତ ମରାଳ ଯୁଗଳ

ପ୍ରସ୍ଫୁଟିତ କୁମୁଦିନୀ ॥

ତୁମ ଧରା ଅବତରଣ ପାଇଁକି

ଆଗୋ ମା ସିଂହବାହିନୀ

ଉତ୍କଣ୍ଠିତା ଏଇ ଚାରୁ ଶୋଭାମୟୀ

ପ୍ରକୃତି ସହ ଧରଣୀ ॥

ଆସ ମାତେ ତୁମେ ବିପତ୍ତି ଅନ୍ଧାରେ

ଆଲୋକ ବର୍ତ୍ତିକା ହୋଇ

ଆସ ମାତେ ତୁମେ ଦୁଃଖର ସାଗରେ

ଖୁସିର ସମ୍ଭାର ନେଇ ॥

Advertisement

ଆସ ମାତେ ତୁମେ ସୁହାଗିନୀ ଶିର

ସୀମନ୍ତ ସିନ୍ଦୂର ହୋଇ

ଆସ ମାତେ ତୁମେ ସବୁ ସମ୍ପର୍କରେ

ପ୍ରେମର ଦ୍ୟୋତକ ହୋଇ ॥

ବସନ୍ତର ପୁଷ୍ପ ସମ୍ଭାର ହୋଇ ମା

ଆସ ଏ ଶରତ ଲଗ୍ନେ

ଫଗୁଣର ରଙ୍ଗ ଭରିଦିଅ ମାତେ

ସମସ୍ତଙ୍କ ତନୁମନେ ॥

ସବୁରି ମନର ଅଭିଳାଷେ ମା ଗୋ

ପୂର୍ଣ୍ଣତା ଦିଅ ଭରି

ଶିଥିଳ ଶରୀରେ ଉଷ୍ମ ରକ୍ତର

ପ୍ରବାହ ଯାଉ ସଂଚରି ॥

ତୁମେ ଗତି ମୁକ୍ତି ସକଳ ଶକତି

ମହିମା ତୁମ ଅପାର

ଆସ ଅବତରି ଏ ଧରା ଧାମରେ

ସର୍ବ ଦୁଃଖ କର ଦୂର ।।ା