ଆଷାଢ ରାତି

ଆଷାଢ ରାତିରେ ଲାଗେ ଅସ୍ତବ୍ୟସ୍ତ 

ଗଡିଗଲେ ସଞ୍ଜ ବେଳ

ଚାହେଁ ମନପକ୍ଷୀ ଲେଉଟିବ ନୀଡ

ବିଳମ୍ବେ ନୁହଁ ସଅଳ ।

ଚମକେ ବିଜୁଳି ଗରଜେ ବାଦଲ

ବରଷଇ ଝିପିଝିପି

ଗରଜଇ ନିଶା ଝିଙ୍କାରୀ ଟଙ୍କାରି

ବେଙ୍ଗୁଲି ଛାଡଇ ରଡି ।

ଭିଜେ ରସରାସେ ପ୍ରଲମ୍ବିତ ରାତ୍ରୀ

ମନ ଗୋପ ବୃନ୍ଦାବନ 

ମଧୁର ଆଳାପେ ବିତଇ ସମୟ

ନିବିଡେ ଭାବ ସମ୍ବନ୍ଧ ।

ବିଭୋରେ ଜୀବନ ସବୁଜ ସ୍ବପନେ

ଆସଇ ରଜ ମଉଜ 

ଝୁଲଇ ଦୋଳିରେ କନ୍ଯା ରଜବତୀ

ଚାଲେ ନୂଆ ସଜବାଜ ।

ପାଚଇ ପଣସ ଜାତି ଜାତି ଆମ୍ବ 

ମହକଇ ପୋଡପିଠା

ଭିଡ ବଡଦାଣ୍ଡେ ଗୁଣ୍ଡିଚା ବାହୁଡା

ହୁଏ ପର୍ବ ରଥଯାତ୍ରା ।

କରେ ଅର୍ନ୍ତମୁଖୀ ଆଷାଢ ରଜନୀ

ଦିଏ ସୁଖ ଅବସର

ପ୍ରିୟ ପରିଜନ ସଜନୀ ସଙ୍ଗତେ

ଅବସାଦ ହୁଏ ଦୂର ।