ଆସିଲି ବାଉଳି ହୋଇ

ପ୍ରାଣବନ୍ଧୁ ମୋତେ ବାଇବାକୁ ଦିଅ

ମୋହନ ମୁରଲୀ ଆଜି ,

ଅସରନ୍ତି ପୀଡ଼ା ଭୋଗିଲିଣି ମୁହିଁ

ତୁମରି ପ୍ରେୟସୀ ସାଜି ।

ଲୋକ ଅପବାଦ,ଆକଟ ଯୋଗୁଁ ମୁଁ

ଭେଟିନାହିଁ କେତେଦିନୁ ,

ଦିବାନିଶି କିନ୍ତୁ ତୁମରି ପରଶ

ଲୋଡୁଥିଲା ଏଇ ତନୁ ।

ସେବେଳେ କାହିଁକି ଦେଖା ଦେଲ ନାହିଁ

ପାରିଲିନି ଆଉ ସହି ,

ହୃଦୟର ଜ୍ୱାଳା ଶାନ୍ତ କରିବାକୁ

ଆସିଲି ବାଉଳି ହୋଇ ।

ଏବେ ମୁଁ ବାଇବି କୃଷ୍ଣ କୃଷ୍ଣ ନାମ

ଏଇ ମୁରଲୀର ସୁରେ ,

ଏକାକାର ହୋଇ ରାସ ରଚିବା ହେ

ନୃତ୍ୟ ଛନ୍ଦେ ପ୍ରେମ ଭରେ ।