ଆସିଛି ହୋଲି

ମୋ ଗାଆଁ ମାଟିରେ    ଫୁଲେଇ ଫଗୁଣ

       ରଙ୍ଗର ପସରା ମେଲି

ବାରତା ଦିଅନ୍ତି        ହଳଦୀ ବସନ୍ତ

       ଆସିଛି ପରବ ହୋଲି ।

ମୋ ଗାଆଁ ପବନ     ବାସେ ଭୁରୁଭୁରୁ

      ବହେ ଚୋରା ଚଇତାଳି

ମନ କିଣିନିଏ       ବଉଳ ବାସନା

       ମହକଇ ବଣମଲ୍ଲୀ ।

ଆମ୍ର ତରୁକୁଞ୍ଜେ     ମତୁଆଲା ହୋଇ

       ପିକ ଗାଏ କୁହୁକୁହୁ

ମନ ପ୍ରଜାପତି      ଭ୍ରମରେ ଭ୍ରମରେ

    ଫୁଲେଫୁଲେ ଖୋଜେ ମହୁ ।

ମୋ ଗାଆଁ ମନ୍ଦିରେ    ଭଜନ କୀର୍ତ୍ତନ

       ହରିବୋଲ ହୁଳହୁଳି

ମିଳନ ଉଚ୍ଚାଟ      ପ୍ରେମ ଅପ୍ରାକୃତ

      ରାଧାକୃଷ୍ଣ ନିଉଛାଳି ।

ଦୋଳ ବିମାନରେ    ରଙ୍ଗର ଅବିର

       ପ୍ରେମମୂର୍ତ୍ତି ଦରଶନ

ବାସନ୍ତୀକ ରାସ    ଫଗୁଣ ପୂର୍ଣ୍ଣମୀ

      ଷୋଳକଳା ପୂର୍ଣ୍ଣକାମ ।

ମୋ ମନ ମୟୂର    ଅଧୀର ବିଭୋର

      ପ୍ରେମର ପୀୟୂଷ ପାନେ

ନିର୍ଝରୁ ସୁନ୍ଦର      ମଧୁର ମୂର୍ଚ୍ଛନା

     ପ୍ରତିକୋଣେ ହୃଦମନେ ।