ଆଶିଷ ଦେ ମା

ପୁଣ୍ୟମୟୀ ମାତା କାନ୍ଦୁଛି ଦୁହିତା

ଆଖିର ଲୁହରେ ଡାକଇ ତୋତେ ,

ସମୟ ହୋଇଛି ବିପରୀତ ଆଜି 

ଢ଼ାଳିଦେ କରୁଣା ଆଶିଷ ଯେତେ ।

କେଉଁ ଆଡ଼େ ନାହିଁ ଗହଳ ଚହଳ 

କାନ୍ଦେ ଗାଆଁ ବିଲ ଗୋହିରି , ପାଟ ,

ପାର୍ବଣ ସ୍ଵାଗତ ସମ୍ଭାରେ ଦେବୀ ମା

ଖୁସିବାସି ନାହିଁ ମନେ ଉଚ୍ଚାଟ ।

କାଶତଣ୍ଡୀ ଆଉ ଶେଫାଳୀ ସୁନ୍ଦରୀ

ପଡିଲେଣି ଲୋଟି ବରଷା ମାଡ଼େ,

କରୋନା ଭୁତାଣୁ କବଳେ ମଣିଷ

ନିତି ପ୍ରତିଦିନ କା' ମୁଣ୍ଡ ଗଡ଼େ ।

ପାପୀ ,ଅପରାଧୀ ଅଧର୍ମୀ , ବିଧର୍ମୀ

ସବୁ ଏକଜୋଟ ଆଜି ଧରାରେ ,

ବଳାତ୍କାର , ହତ୍ୟା ନାହିଁନାହିଁ ରକ୍ଷା

ସଇତାନ୍ ହସେ ନାରୀ ରକ୍ତରେ ।

ସୁରକ୍ଷା ନାମରେ ଶୋଷଣ ଚାଲିଛି

ମରଣ ଦୁଆରେ ବଳି ପଡ଼ୁଛି ,

ସହାନୁଭୂତିର ଶତ ସ୍ଵର ଉଠେ

ନାରୀ ଲହୁ,ଲୁହେ ଧରା ଭିଜୁଛି ।

 

ହଜାରେ ମିନତି ଲକ୍ଷେ ପ୍ରତିଶ୍ରୁତି

ଆଇନ ଆଖିରେ ଧୂଳି ଦେଉଛି ,

ତାରିଖ, ତାରିଖ ବର୍ଷ ପରେ ବର୍ଷ

ଗଡ଼େଇ ଦୋଷୀଟି ଖସି ଯାଉଛି ।

ସକଳ ବିଷୟ ବାସନାର ଜାଲ

ଚାରିପଟେ ତା'ର ରହିଛି ଘେରି ,

କେତେବା ଲଢ଼ିବ ଅବଳାର ପ୍ରାଣ

ଜୀବନ ସଂଗ୍ରାମେ ଯାଉଛି ହାରି ।

ମା ' ଦୁଃଖ ହାରିଣୀ ଜଗତ ଜନନୀ

ଇଶ୍ୱରୀୟ ଶକ୍ତି ମହିମା କେତେ,

ଶକ୍ତିମୟୀ ମାତା ତୋ ଶକ୍ତି ବଳରେ

ହରଣ କରିଦେ ପାପୀ ଜଗତେ ।