ଆସ ମା'ଗୋ ଆସ.....
ଆସ ମା'ଗୋ ଆସ.....
ସଜାଇ ହୋଇଛି ପ୍ରକୃତି ରାଣୀ
ଶୁଶୋଭିତ ଧରା ଧାମ
ଚତୁଃର୍ଦିଗେ ଗୁଞରିତ ହେଉଛି
ଜପୁଛି ତୁମରି ନାମ ।
ସରାଗରେ ଧରା ଚାହିଁ ରହିଛି
ତୁମ ଆଗମନ ପାଇଁ
ଆସ ମା'ଗୋ ଆସ ସରଗୁ ଓହ୍ଲାଇ
ଜଗତ ବସିଛି ଚାହିଁ ।
କାଶତଣ୍ଡୀ ଫୁଟି ଚାମର ସାଜିଛି
ନୀଳ ଆକାଶର ତଳେ
ରାତ୍ରୀ ସାରା ଜହ୍ନ ଉଜାଗର ରହି
ଶୀତଳ ଜୋଛନା ଢାଳେ ।
ଗଙ୍ଗଶିଉଳିର ଭୁରୁଭୁରୁ ବାସ୍ନା
ମଳୟ ଦେଉଛି ବିଞ୍ଚି
ଏ ଧରା ଧାମ ତୁମ ଅପେକ୍ଷାରେ
ଦର୍ଶନ ଦିଅ ପହଞ୍ଚି ।
ନାନା ବର୍ଣ୍ଣ ଫୁଲ ଫୁଟି ଶୋଭୁଛି
କେବେ କରିବ ଧାରଣ
ଅପରାଜିତା,ପଦ୍ମ ଚାହିଁ ରହିଛନ୍ତି
ହେବାକୁ ପାଦେ ଅର୍ପଣ ।
ଅଭୟ ଦାୟିନୀ ଶକ୍ତି ସ୍ବରୂପିଣୀ
ଜୟ ମା'ଗୋ ଦୁର୍ଗା ଜୟ
ତୁମ ଆଗମନେ ଧରଣୀ ବକ୍ଷରୁ
ପାପରାଶି ହେଉ କ୍ଷୟ ।
ଯୁଗେ ଯୁଗେ ମା'ଗୋ ସଂକଟ ମୁଖରୁ
ତୁମେ କରିଛ ଉଦ୍ଧାର
ସେହି ଶୁଭ ବେଳା ପୁଣି ଆସିଅଛି
ବିଳମ୍ବ କିମ୍ପାଇଁ କର ।
ଆସ ମା'ଗୋ ଆସ ସିଂହ ସବାରୀରେ
କରିବାକୁ ପାପ ନାଶ
ଅନ୍ୟାୟ ଦୁରାଚାର ସହ ଲଢିବା ପାଇଁ
ବରଷାଅ ତୁମ ଆଶିଷ ।