ଧର୍ମପତ୍ନୀ

      ଧର୍ମପତ୍ନୀ 
କାହିଁ କେତେ ବାର ତୁମେତ ଭାଙ୍ଗିଛ
        ନୀରବ ଗୁହାରି ମୋର
ତଥାପି ମୁଁ ଅଛି ତୁମରି ପାଖରେ
        ସାଥୀ ଜନ୍ମ ଜନ୍ମାନ୍ତର ।
କେତେଥର ମୁହିଁ ନିଜକୁ ଯୋଡିଛି
          ହୃଦୟେ ଆଘାତ ପାଇ 
ତଥାପି ହାରିନି ତୁମରି ପାଇଁ ମୁଁ 
       ରହିବି ସାଥୀ ଟେ ହୋଇ ।
ତୁମେ କି ବୁଝିବ ମୋ ମନ ଦରଦ
       ଅଦେଖା ଲୋତକ ଧାର
ଦେଖି ବି ଜାଣନା,ଜାଣିବି ବୁଝନା
       ମନର ସାଇତା କୋହ ।
ଆଶା ଓ ଆକାଂକ୍ଷା ସଙ୍ଗିନୀ ସାଜନ୍ତି
        ମୋ ଏକାନ୍ତ ସମୟରେ 
ଅଦେଖା ଲୋତକ ଅକୁହା ବେଦନା 
       ବୁଝିକି ପାରିବ ଥରେ ।
ଧର୍ଯ୍ୟ ଧରି ମୁହିଁ ପ୍ରତି ମୂହୁର୍ତ୍ତରେ
       ହୃଦୟକୁ କରିଛି ଦୃଢ଼
ସମୟ ଗଢିଛି ପରିପକ୍ୱ ମନ
      ଧର୍ଯ୍ୟ ହୋଇଅଛି ଗାଢ଼ ।
ନିଜ କାଠଗଡା ଭିତରେ ମୁଁ ନିଜେ 
       ନିତି ହୋଇଥାଏ ଛିଡ଼ା 
ସମାଜର ଯେତେ ଆକଟ ସଂକଟ
        ମୋତେ କରିଥାନ୍ତି ଯେରା ।
ଅଭାବ ଦୁର୍ଭାଗ୍ୟ ସବୁ ମୁଁ ସହିଛି 
         ଚାହେଁ ନା ଦୋଷିର ଆଖ୍ୟା
ଧର୍ମପତ୍ନୀ ହେବାର ସମ୍ମାନ ମିଳୁ
        ଏତିକି ମୋହର ଭିକ୍ଷା ।