ରଜ ମଉଜ
ରଜ ମଉଜ
କେତେ ଖୁସି ନେଇ ରଜ ସଜବାଜ
ହେଉଥିଲା କୁନି ଝିଅ
ମମତାମୟୀ ତା ମାଆକୁ ନ ଦେଖି
ଛୁଟୁ ଥିଲା ଲୁହ ସୁଅ ।
ବଡ ବାପା ଆସି ବୋଇଲେ କାହିଁକି
କାନ୍ଦୁଛୁ ମୋ ଗେହ୍ଲୀ ରାଣୀ
କେଉଁ କଥା ତୋର ଊଣା ପଡିଗଲା
ଦେଲେନି କି କେହି ଆଣି ।
ଜାବୁଡି କି ଧରି କାନ୍ଦି ଦିବ୍ୟାଶିରୀ
ଠାରି ଘର ଦେଖାଇଲା
ପର ପୁରୁଷ ସାଥେ ବୋହୂ ଦେଖି ବଡ
ବାପା ତା ତଟସ୍ଥ ହେଲା ।
ଫୋନ୍ କରିଣ ଖରାରେ ଖରାରେ
ବାପାକୁ ତା ଡକାଇଲେ
ଦିନ ଦ୍ବିପହରେ ବିଧବା ଝିଅର
କାରାନାମା ଦେଖାଇଲେ ।
ଯେତେ ବୁଝାଇଲେ ବୁଝିଲାନି ସିଏ
ଜିଦ୍ ରେ ଅଟଳ ହେଲା
କୁନି ଝିଅ ତାର ମାଆ ମାଆ ଡାକି
ଜାବୁଡି ଧରି କାନ୍ଦିଲା ।
ଠେଲି ଦେଲା କୁନି ଝିଅକୁ ସିଏ
ବବା ପାଦେ ପଡି ଗଲା
ଧାଇଁ ଆସି ବଡ ଭାଇଟି ତାହାର
ଶକ୍ତ ଚାପୁଡା ମାରିଲା ।
ରଜ ଭାର ନେଇ ଭଉଣୀ ଘରକୁ
ଆସି ଦେଇ ଥିଲା ସିଏ
ସେ ଭଉଣୀ ଆଜି ମହତ ନ ରଖି
ନିନ୍ଦାରେ ଡୁବେଇ ଦିଏ ।
ଯେତେ ବୁଝେଇଲେ କାହାରି କଥାକୁ
କଲା ନାହିଁ କର୍ଣ୍ଣପାତ
ପ୍ରେମ ପାଗେଳୀ ସେ ଏମିତି ଗୋଟିଏ
ଭୁଲିଲା ମାନ ମହତ ।
ବେଖାତିର କରି ସମସ୍ତଙ୍କୁ ସିଏ
ପାଦ ଆଗେ ବଢାଇଲା
ପ୍ରେମିକ ହାତକୁ ଜାବୁଡି ଧରି ସେ
ଘରୁ ବାହାର ହୋଇଲା ।
ଘରର ଇଝତ ବଞ୍ଚେଇବା ପାଇଁ
ମିଳିତ ନିଷ୍ପତ୍ତି ନେଲେ
ଥାନାରେ ଜଣେଇ ମନ୍ଦିରରେ ଯାଇ
ବିବାହ ସେ କରି ଦେଲେ ।
ଏମିତି ବିକଳେ କାନ୍ଦୁ ଥାଏ ଝିଅ
ପୁଅ ତା ବେହୋସ ହେଲା
ହସିଲା ସଂସାର ଲୁହର ଭିଜିଲା
ନା ମାଆ ତାର ଫେରିଲା ।
ଝିଅକୁ ଫୋପାଡି ନୂତନ ସ୍ବାମୀର
ହାତ ଧରି ଚାଲି ଗଲା
ରଜ ସଜବାଜ ରଜର ମଉଜ
ଆଖି ଲୁହେ ଭିଜି ଗଲା ।
ଆଖିର ଲୁହର ଛାତିର କୋହରେ
ଯନ୍ତ୍ରଣା ନିଆଁରେ ଆଜି
ରଜ ସଜବାଜ ରଜର ମଉଜ
ଆପେ ଯାଇଥିଲା ହଜି l