ଆଖିର ଆଇନାରେ ସଖୀ

ତୁମରି ଆଖିର ଆଇନାର ସଖୀ

ଦେଖେ ମୁଁ ପ୍ରେମର ଛାଇ

ସକାଳ ପାହିଲେ ନିଦ ଭାଙ୍ଗିଗଲେ

ତୁମକୁ ରୁହେ ମୁଁ ଚାହିଁ I

ଚାଲିଗଲେ ତୁମ ପାଦର ପାଉଁଜି

ବାଜୁଥାଏ ରଣଝଣ

ତୁମ ଦେହତେଜ ଭେଦିଯାଏ ମୋର

ହୃଦୟର ପ୍ରତି କୋଣ I

ମୋ ଖୋଲା ଝରକା ଫାଙ୍କରୁ ତୁମକୁ

ନିରେଖି ମୁଁ ନିତି ଦେଖେ

ତୁମଠାରେ ମନ ହଜିଯାଏ ଯେବେ

କବିତାଟିଏ ମୁଁ ଲେଖେ I

ତୁମ ପାଦଶବ୍ଦେ ବାଚାଳ ହୁଏ ମୁଁ

ଉଚ୍ଚାଟିତ ହୁଏ ମନ

ତୁମପାଇଁ ମୋର ଶିରା ପ୍ରଶିରାରେ

ଭରିଯାଏ ଶିହରଣ I

ତୁମରି ଦେହର ଖୋଲା ଅଗଣାରେ

ଆଖି ଖେଳେ ଲୁଚକାଳି

ମୋ ଖିଆଲି ମନ ତୁମ କବରୀରେ

ଝୁଲି ଝୁଲି ଖେଳେ ଦୋଳି I

ଲାଜଲାଜ ହୋଇ ମୋ କାନେ ଲୋ ସଖୀ

ଶୁଣାଇ ପ୍ରେମର ଗାଥା

ମୋ ଉଦାସ ମନେ ପୁଲକ ଜଗାଅ

ହରିନିଅ ସବୁ ବ୍ୟଥା I