ଆଜିଠାରୁ ହେଲା ଗାଆଁରେ ରାୟ

ଦାଣ୍ଡେ ଧାଉଁଥିଲା ଧୋବଲା ଷଣ୍ଢ

ଫଁ ଫଁ ଶ୍ୱାସ - ହଲାଇ ମୁଣ୍ଡ ।

ଦୁଇପହରିଆ ଖରାରେ ଯାଇ

ମଖାରୁ ବାଡିରୁ ପରିବା ଖାଇ ।

ଷଣ୍ଢ ଶୋଇଥିଲା ନିଶ୍ଚିନ୍ତ ହୋଇ

ବଗୁଲିଆ ଟୋକା ପହଞ୍ଚି ତହିଁ ।

ଛପି ଛପି ଅତି କଉଶଳରେ

ତାଳ ବରଡାକୁ ଷଣ୍ଢ ଲାଞ୍ଜରେ ।

ବାନ୍ଧି ଦେଇ ଦେଲେ ସେ ତାଳି ମାରି

ଷଣ୍ଢ ଦଉଡିଲା ହୁରୁଡ଼ି କରି ।

ରୂପ ଦେଖି ତା'ର ଲୋକ ଛାନିଆ

ଭୀମା ପହିଲମାନ ଡରନ୍ତା କିଆଁ !

ସାହସ କରିକି ସାମନାରୁ ଆସି

ହାତେ ଷଣ୍ଢ ଶିଙ୍ଗ ଧରିଲା କଷି ।

ଆଉ କିଛି ଲୋକ ସାହାଯ୍ୟ କଲେ

ଷଣ୍ଢ ଲାଞ୍ଜୁ ବର୍ଡା ଫିଟାଇ ଦେଲେ ।

ଚଗଲା ପିଲାଙ୍କୁ କରିଲେ ଗାଳି

ପ୍ରାଣୀଟିଏ ସିଏ ନ ଥିଲ ଭାଳି ।

ଆମ ଭଳି ତା'ର ରହିଛି ପ୍ରାଣ

କଷ୍ଟ ହେବନାହିଁ ଦେହକୁ କଣ !

ଡରରେ ପରା ତା' ଥରୁଛି ଦେହ 

ଅବିବେକ କେହ୍ନେ ହୋଇଲ କୁହ !

ଭୋକରେ ଫସଲ ଖାଇବା ଦୋଷ 

ବଳଦ ନୁହେଁ ଯେ କରନ୍ତା ଚାଷ !

ଆଜିଠାରୁ ହେଲା ଗାଆଁରେ ରାୟ

ସଭିଏଁ ମାନିବ ଦେଇଥା ଲୟ ।

ବୁଲା ଗୋରୁଙ୍କୁଟି ନ ଦେଇ ମାଡ 

ଫସଲକୁ ଆଗେ ଦେବରେ ବାଡ଼ ।