ଆଜିର ଖବର

ପାଣିଚିଆ ସଜବାଜ

ବୀତସ୍ପୃହ ମନେ ନାହିଁ 

ସେତେଟା ସରାଗ

ମୁହଁ ଶୁଖାଇ ବସି ରହିଛି

ନିପଟ ଗାଉଁଲୀ ଝିଅ 

ନିରିମାଖୀ ନାଁଟି ତା ରଜ,

ଲାଗେ ତାକୁ ଜର ଜର

ବାରମ୍ବାର ପଡଇ ବେମାର

କିଏ ବା ତା ରଖୁଛି ଖବର ।

ଅସହ୍ଯ ଗ୍ରୀଷମ ତାପ

ପ୍ରବଳ ବି ଗୁଳୁଗୁଳି, ଝଞ୍ଜା ଓ ବତାସ

ଜୀବନର ଚଲାପଥ କଣ୍ଟକିତ

ଅବଲୁପ୍ତ ସବୁଜିମା ଅମୃତ ନିର୍ଯ୍ୟାସ 

ଚାଲିଚାଲି ଅଲିଅଳୀ ବିବଶ ଅବଶ

ତରକାହିଁ ହଲିଝୁଲି ଖେଳିବ ସେ

ପୁଚି ରଜଦୋଳି

ଫୁରୁସତେ କରିବ ଅୟସ ।

ବରଷୁନି ଝରଝର ମେଘ

ନିର୍ନିମେଷ ଦୁଇ ଆଖି

ଚାତକ ପକ୍ଷୀଟି ପ୍ରାୟ

ଏକଲୟେ ରହିଛି ଅନାଇଁ

ମେଣ୍ଟୁନାହିଁ ଜୀବନର ଶୋଷ,

ଅବସନ୍ନ ଦେହ

କ୍ଷୀଣ ମନ ଶୁଷ୍କ ଓ ନିରସ

ଢଳିଯାଏ ଅକାରଣ

ରଜର ବୟସ ।