ଆହେ ମଣିଷ ଜାତି

କାଆ କାଆ କରି କାଉ ରାବଇ

ପାହିଲେ ପରା ରାତି

ଅଳସ ଛାଡି କରମ କର

ଆହେ ମଣିଷ ଜାତି ।

କୁହୁ କୁହୁ ସୁରେ ରାବେ କୋଇଲି

ବସନ୍ତ ବେଳ ତିଥି

ମନରୁ ହିଂସା କପଟ କାଢି

ବାଣ୍ଟିବା ସ୍ନେହ ପ୍ରୀତି ।

ଘୁମୁ ଘୁମୁ ଗାଏ ଲୋଟଣୀ ପାରା

ବସାରେ ତା'ର ଶାନ୍ତି

ବିନା ଦୋଷରେ ରାଗରୁଷାରେ

କର ନା କା'ର କ୍ଷତି ।

କିଚିରି ମିଚିରି ଘର ଚଟିଆ

କିବା ଦିନ ଓ ରାତି 

ପାଠପଢ଼ାରୁ ହଟିବା ନାହିଁ

ଖେଳାଖେଳିରେ ମାତି ।

ପଞ୍ଜୁରୀରେ ଯେ ଶୁଆ ଗାଉଛି

ରାମ ରାମର ଗୀତି

ବାନ୍ଧି ରଖନା ପଶୁ ପକ୍ଷୀଙ୍କୁ

ସିଏ ବି ଚାହେଁ ମୁକ୍ତି ।

କକ କକ କଅ କୁକୁଡ଼ା କହେ

ଅସନା ଖାଇ ନିତି

ଗରବ କେବେ କରିବା ନାହିଁ

ଅତିରୁ ହୁଏ ଇତି ।