ମଧୁର ମାଆର ନାମ

ମାଆର ନାମ ଅମୃତ ବୋଳା

  ମଧୁର ତାର ଡାକ

ନିର୍ମଳ ସ୍ୱଚ୍ଛ  ପ୍ରଶାନ୍ତ ମୁଖେ

  ଭରା ସୋହାଗ ସୁଖ

  ଅନୁପମ ତା କୋଳ

ନାହିଁ ବିପଦ ସଂସାରେ ସାର

  ନିର୍ଭର ସୁକୋମଳ ।

ଥରଇ ଯାର  ହୃଦୟ ତନ୍ତ୍ରୀ

  ଦୁଃଖ କଷଣ କାଳେ

ସୁଖ ସମ୍ପଦ  ମନାସି ଲୁହ

  ଦିଅଁ ଚରଣେ ଢାଳେ

  ମାଆଟି ପରି କିଏ

ମମତାମୟୀ  ଜନମଦାତ୍ରୀ

  ଚଳନ୍ତି ଦେବୀ ସିଏ ।

ଜନମ ଭୂଇଁ  ଜନମ ମାଟି

  ତା ଲିପି କଥା ଗୀତ

ନିବିଡ଼ ତାର ସ୍ନେହ ବନ୍ଧନେ

   ଜୀବନ ପ୍ରତିଭାତ

  ମଧୁର ମାତୃଭାଷା

ଜାତି ଉନ୍ନତି ମୂଳ ମନ୍ତର

  କରିବି ନିତି ଘୋଷା ।

ମା ବିନା ସର୍ବେ ମୁଁ ତୁମ୍ଭେ ଆମ୍ଭେ

  ସୃଷ୍ଟି ହିଁ ଅସମ୍ଭବ 

ଈଶ୍ୱରୀ ମାଆ ପାଦେ ତା ସ୍ବର୍ଗ 

  ସୁଖଶାନ୍ତି ବୈଭବ

  ମା ହିଁ ପରମାରାଧ୍ୟା

ଜୟ ମାତୃଶକ୍ତି ମାଟି ମାତୃଭାଷା

  ବରଦା ପୂଜ୍ୟା ସର୍ବଦା ।

ଜ୍ଞାନ ବିଜ୍ଞାନ  ତପସ୍ୟା ସେବା

   ମହତ ଅନୁଭବ

ମୋର ଜୀବନ  ସ୍ପନ୍ଦନ ଶକ୍ତି

  ନିତ୍ୟ ସଞ୍ଚରି ଭାବ

  ଯୋଗ ସାଧନ ମୂଳ

ଉନ୍ନତି ତାର  ଚରମ ଲକ୍ଷ୍ୟ

  ଅଟେ ମୋ ଜୀବନର ।