ଆବୋରିବି ଶୂନ୍ୟ ଭୂଇଁ

ଚକା ଚକା ଆଖି ସୁଷମା ନିରେଖି

ତୁମ ପ୍ରେମେ ଭିଜୁଥିବି

ଭିନ୍ନ ଅନ୍ଦାଜରେ ଭାବ ମନ୍ଦିରରେ

ତୁମ ନାମ ଜପୁଥିବି ll

ଦୂର ଦିଗବଳୟେ ପ୍ରାଚୀ ଗଗନରେ

ଅନ୍ତରୀକ୍ଷେ ଥିବି ଚାହିଁ

ଅନ୍ତର ବେଦନା ସମର୍ପି ତୁମକୁ

ଆବୋରିବି ଶୂନ୍ୟ ଭୂଇଁ ll

ରାତି ରାତି କେତେ ଉଜାଗର ରହି

ସପନର ଶେଜ ପାରି

ତୁମରି କରୁଣା କଟାକ୍ଷ ସୀମାରେ

ହୃଦୟ ହେଉଛି ଘାରି ll

ଦିବ୍ୟ ସମ୍ମୋହନ ସଂପ୍ରୀତି ସୁହାଗ

ଶୁଭେଚ୍ଛାର ବାର୍ତ୍ତା ନେଇ

ଦେହ ଦେଉଳରେ ପ୍ରୀତି ପ୍ରେଖ୍ୟାଳୟେ

ଆସ ତୁମେ ଶ୍ରଦ୍ଧା ବହି ll

ଅନେକ ଦିନର ସମ୍ପର୍କର ଡୋରି

ଛିଣ୍ଡାଇ ଦେବନି କେବେ

କରି ହୀନିମାନ ଏ ଛାର ଜୀବନ

ପିଣ୍ଡୁ ଯିବ ଛାଡ଼ି ଯେବେ ll

ସ୍ୱର୍ଗ ଅବା ନର୍କ କେଉଁ ପୁରେ ଯିବି

କେଉଁ ପଥ ମୋର ପ୍ରାପ୍ୟ

ପ୍ରାପ୍ତି ଅପ୍ରାପ୍ତିର ଘୋର ସଂକଟରେ

ରହିଥିବି ହୋଇ ଗୋପ୍ୟ ll

ଗଲା ଗଲା ବୋଲି ସଭିଏଁ କହିବେ

ତୁମ ପାଖେ ନେବ ମୋତେ

ଲୋଡ଼ାନାହିଁ ମୋର ସ୍ବର୍ଗୀୟ ସମ୍ଭୋଗ

ଲୋଡୁଛି ସୌହାର୍ଦ୍ଧ୍ୟ ଟିକେ ll