वळण विसाव्याचे

जीवनाच्या रंगभूमीवर

दुःखाचे काटे सलल्यावर

शिणलास काया वाचा मने

घे विसावा ह्या वळणावर

संकटांशी केलास सामना

पुरुन उरलास तयांना

किती गौरवू तव यत्नांना

थांब जरासा इथे वळताना

प्रतिकूल परिस्थिती जरी

अखंड जिद्दीने लढलास

कधी हार नाही मानलीस

जरा थांब रे तू विसाव्यास

विश्वस्तांनी तुज सावरले

मदतीचे हात तुज दिले

मैत्रभाव बंधन पाळले

थांब रे कृतज्ञ वळणास

जीवन युद्धच घनघोर

मात मनूची संकटांवर

विसरुन सारे क्षणभर

घे विसावा ह्या वळणावर

वळणावरचा हा विसावा

शक्ती, ऊर्जा देईल तुजला

टवटवीत तनमनाने

पथ रम्य भासेल तुजला