विनोदी उखाणे स्पर्धा

परस बागेत मी बियाणं पेरलं 

फळभाज्या वेलींनी ते घेरलं|१

देवाच्या कृपेने खूपच पिकलं

जाऊन बाजारी सहमी ते विकलं|२

त्याचे खुप खुप पैसे हो झाले

ते सोनाराला मी देऊन आले |३

घेऊन तेथे मंगळसूत्र नि डोरलं 

ह्यांचे नाव त्यावरच मी कोरलं|४

नाव ? काय सांगू ? नावात काय?

बाळाचे दिसतात पाळण्यात पाय|५

छमछम पैंजण पायात वाजतात

उखाणा घेतांना जोडपी लाजतात|६

सा-यांना ऐकावासा वाटे उखाणा

नाव घ्यायचा तो ठरे एक बहाणा|७

सरस नाव घेइल तो एकच शहाणा

नसलं येत तर मूग गिळून बसाना|८

गालातल्या गालात खुदकन हसा

नस्ता का ते यमक जुळवून फसा|९

नाहितर तुम्ही नाव असलं घ्याल

आपलंच अज्ञान दाखवून द्याल|१०

सोन्याची विजार चांदीचे बक्कल

आमच्या ह्यांना भलेमोठे टक्कल|११

मी विग देऊन लढवली शक्कल|

तरी म्हणे मला जरा नाही अक्कल|१२

सांगा बरे ह्यात खरे माझे काय चुकले|

माझ्यासम हुशार पत्नीस हेच मुकले| |१३

(प्रथमत:समस्त स्री वर्ग व टक्कल असलेल्या पुरुष वर्गाची माफी मागून सहज सुचलं म्हणून लिहिलं आहे.विनोदी उखाणे लेखन स्पर्धा ह्यातूनच हास्य कविता लिहिली आहे कृपया नोंद घ्यावी.)