तुझ्यावर मरतोय
तुझ्यावर मरतोय
स्माईलवर तुझ्या मी
कविता करतोय
हृदयाच्या गाभाऱ्यातून
तुझ्यावर मरतोय ||0||
मला पाहून पापण्यांचं
उघडझाप करणं
जवळ येता लाजून
बाजूला सरणं
नजरेत तुझं सौंदर्य
पुरेपूर भरतोय
हृदयाच्या गाभाऱ्यातून
तुझ्यावर मरतोय ||1||
गालावर हसतांना
खळी खुलावी
निरागस कोमल जणू
कळी फुलावी
साधेपणावर मी
काळीज हे हरतोय
हृदयाच्या गाभाऱ्यातून
तुझ्यावर मरतोय ||2||
दुनियादारी चा
गंध नाही
स्वछंद जगणं
काही बंध नाही
हृदयात प्रेमाचा
रस पाझरतोय
हृदयाच्या गाभाऱ्यातून
तुझ्यावर मरतोय ||3||
मितभाषी असली तरी
नजर बोलते
हृदयातली सारी
गुपितं खोलते
प्रत्येक क्षणी मी
तुझ्याकडे सरतोय
हृदयाच्या गाभाऱ्यातून
तुझ्यावर मरतोय ||4||
हाताला हाताचा
स्पर्श होता
दुरावा दाखवतेस
खोटा खोटा
कल्पनेत तुझा हात
हाती धरतोय
हृदयाच्या गाभाऱ्यातून
तुझ्यावर मरतोय ||5||