स्वातंत्र्याचा अर्थ ?

रिकाम्या उपाशी पोटाला 

दोन घासांची आस आहे 

आजही भुकेने फडफडतो 

गरिबांचा श्वास आहे ||0||

स्वातंत्र्याचा नेमका अर्थ 

आजही उमजत नाही 

मूठभर धनिकांच्या हाती का गेलं 

हेच समजत नाही 

झोपडीत इथं दिवाही नाही 

बंगल्यांना दिव्याची आरास आहे 

आजही भुकेने फडफडतो 

गरिबांचा श्वास आहे ||1||

धर्माचं राजकारण 

सत्तेसाठी फायदेशीर ठरावं 

यांना सुरक्षा रक्षकांचे कडे 

जनतेनं दंगलीत मरावं 

सत्तालोलूप मनांना फक्त 

खुर्चीचा हव्यास आहे 

आजही भुकेने फडफडतो 

गरिबांचा श्वास आहे ||2||

आजही उपेक्षित दलितांचा 

समाज आहे 

आजही मनुवाद्यांना 

चातुर्वर्णाचा माज आहे 

पोखरलीत मनं जातीयवादानं 

बाहेरून सारं झकास आहे 

आजही भुकेने फडफडतो 

गरिबांचा श्वास आहे ||3||