शब्दांच्या पलीकडले

मौनात ही असतात शब्द

हृदयापासून ऐकायला हवे.

भाव मनातले अबोल

शब्दावाचून कळायला हवे.

शब्द बोलतात सगळ

भावना असतात मुक्या

 तोलत असताना स्पंदने

सगळ्या भाषा फिक्या.

अनामिक बोली हृदयाची

सगळ्यांनाच कळत नसते.

 शब्दावाचून अडत नाही

नजरही पुरेशी असते.

अंतरातले उमाळे असतात

शब्दांच्या ही पलीकडले

आपण मात्र राहतो

भावनांच्या ही अलीकडे.

हृदयाची भाषा असते

सगळ्या भाषांत न्यारी

कुठली लिपी नसतानाही

मनात ठसते खरी.

प्रेम असते व्याकरण

भावना असते अलंकार

शब्दांची गरज नसते

जेथे माया निरंकार..