ओढा.....

तळ्याच्या सांड्यातुन

झाला उगम फेसाळ

वाट वनावनातुन

उफळुण खळखळ

वळण वळण घेता

जल धारेत निर्मळ

वहातो खळखळुणी

कसं जल झुळझुळ

वहातो शिवारातुन

विहिरीला आंदण

बांधाच्या पलिकडे

पाणवठ्याचे ठिकाण

गाव वेशीच्या जवळ

धोबी घाट त्याच्यावर

बायामानसांची गर्दी

घुणं न्हानं डोहावर

चिमुकले करे मस्ती

शिवनापाणी जलात 

खुळी मासुळीचा खेळ

चाले ओढ्याच्या धारेत

ओढा वाहे तिथे संथ

स्मशान जिथे एकांत

झाडाझुडतुन वाहे

धार ओढ्याची वेगात

गावगावातून वाहे

वरदान निसर्गाच

जाउन भेटे शेवटी

नाव ओढ्याला नदिच