निरांजनातील वाती

निरांजनातील वाती, नित्य जळतात 

वेदना तयांच्या सांगा, कुणा कळतात !! धृ !!

जरी दिसत असला, इवलासा धागा 

आहे अस्तित्व त्याचेही, द्यावी त्याला जागा 

नको तेवढे साहतो, चटके जिव्हारी 

तरी लख्ख उजळतो, प्रत्येकाच्या द्वारी

वाटा अंधाऱ्या अताशा, दूर पळतात !! १ !!

जोडी पणती दिव्याची, किती गोड वाटे 

सुख फुलासम जरी, तुडविले काटे 

साथ तेलाची लाभता, ओल्या होती वाती 

वारा बिलगतो जसा, बसता एकांती 

फुलवाती मनाजोग्या, छान वळतात !! २ !!

निजतात खुशालीने, मालवून वात 

दृश्य पाहून साठते, दुःख काळजात 

प्रकाश देऊनी साऱ्या, अंधारच भाळी 

येऊ नये कधी अशी, कुणावर पाळी 

रात्री जळणे दिवसा, अश्रू ढळतात !! ३ !!