गझले तुझ्या नशेने

झाले असेल माझ्या हातून पाप काही

का याचना क्षमेची मंजूर होत नाही

संसार एकट्याने झाला कधी कुणाचा

जर मी असेन राजा राणी म्हणा तिलाही

आयुष्य पास होण्या लाखो दिल्या परीक्षा

नापास होत गेलो वार्षिक कधी तिमाही

सोडून हात माझा गेलीस का अशी तू

केली कधीच नाही पर्वा प्रिये जराही

शेतात थेंब माझ्या येतो कधीतरी, पण

डोळ्यात आसवांचा हा पूर बारमाही

वृत्तात गझल रचण्या दमछाक फार होते

भलतेच कसब लागे वाटे तशी सजाही

गझले तुझ्या नशेने बेधुंद जाहलो मी

पर्वा मला न त्याची बदनाम मी तसाही