मुंगी साखरेचा रवा बालपण
मुंगी साखरेचा रवा बालपण
आज म्हणतो मुंगी साखरेचा रवा
बालपण मला आता देगा देवा |
बालपणी थोरामोठ्यांना पाहून का
केला कळेना उगाच त्यांचा हेवा | |१| |
बालपणीचा काळ खरच होता
किती तरी समाधान व सुखाचा |
भांडून एकत्र होतो नव्हता वैरभाव
दुरावा मनी नात्यात दु:खाचा | |२| |
शाळा,अभ्यास ,खानपान,खेळणं
झोपणं दिनक्रम असे तो एवढाच |
पालक नि सानथोरां कडून गोष्टी
ऐकण्यात वाटे रसही तेवढाच | |३| |
सुलभ निरागस होती बालपणीची
मैत्री अन् निर्विवाद होता लळा |
वाहता निर्झर अवखळ बालपण
हर्षाचा फुलवीतसे रम्य मळा | |४| |
नव्हते ओझे मनावर भविष्याचे ना
मानगुटीवर मूळी भूतकाळाचे भूत |
वर्तमानात होतो बिनधास्त उडवत
आकाशात पतंग हाती धरून सूत | |५| |
भोवरा,चेंडू फळी,विट्टी दांडू चाले
बाहुल्यांचा भातुकलीचा खेळ |
रेडिओवरची ऐकत बडबडगीते
नव्हता कळत कुठे जायचा वेळ | |६| |
नव्हता दूरध्वनी,दुरदर्शन संगणक
होता वाचन लेखनास भरपूर वाव |
इन्स्टंट पदार्थ जरी नव्हते पौष्टिक
रानमेव्यावर मारीत होतो ताव | |७| |