मोरो कविता का रंग

काव्यशास्त्र व्याकरण, येकी नही मोला जान |

लिखु  कल्पनाको  सार, बन  कविता सुजान ||धृ||

मोरो कवितामा जुळ्या, शब्द शब्दकाच मोती |

सुच्या यमक श्रृंगार, कृपा वाग्देवीकी होती ||

लेखनीला मिली धार, येकी नही मोला जान |

लिखु कल्पनाको सार, बन कविता सुजान ||१||

मोरो कविताका सुर, जसी बोली कोयलकी |

गुंज सबको कानमा, खण खण पायलकी ||

सारेगामा कसा आया, येकी नही मोला जान |

लिखु कल्पनाको सार, बन कविता सुजान ||२||

पसरसे कवितामा, गंध धरनी मायको |

देसे सुगंध मनला, घीव बखल सायको ||

कसी महक भरीसे, येकी नही मोला जान |

लिखु कल्पनाको सार, बन कविता सुजान ||३||

पशु पक्षी रव्ह सेती, सदा निसर्ग को संग |

असा साधासुधा सेती, मोरो कविताका रंग ||

कसो बनेव मी कवी, येकी नही मोला जान |

लिखु कल्पनाको सार, बन कविता सुजान ||४||