मज आस ना कुणाची...
मज आस ना कुणाची...
घनगर्द आज माझ्या काळोख अंतरीचा,
मज आस ना कुणाची, मज ध्यास ना कुणाचा ।
राती वरुन गेल्या आसवांत चिंब ओल्या,
स्वप्नीही आज माझ्या क्षण सुखाचा न आला ।
मनी घाव खोल झाले परि वार हा कुणाचा,
मज आस ना कुणाची, मज ध्यास ना कुणाचा ।
डोळ्यांत आज जागा ना आसवांशिवाय कोणा,
या भाबड्या मनाचा कुणी साधला निशाणा ।
तीर उरी रूटलासे, धनु कोठल्या हातांचा?
मज आस ना कुणाची, मज ध्यास ना कुणाचा ।
निःशब्द सूर झाले, स्वर आत गोठलेला,
मनी माझिया आता रे आघात साठलेला ।
मुखी शब्द ना फुटावे, मज धाक हा कुणाचा,
मज आस ना कुणाची, मज ध्यास ना कुणाचा ।
या मोडक्या मनाला उरली न काही आशा,
कुणी सावरावे अशी हि नाही मला अपेक्षा ।
मनी खंत ना कशाची, मज खेद ना कशाचा,
मज आस ना कुणाची, मज ध्यास ना कुणाचा ।