मी पाहिले...!

हृदयास मी हृदयात हृदयाच्या

हळूच आज डोकावताना पाहिले

आठवणींत तुझ्या मनास माझ्या

जेव्हा मी हरवताना पाहिले

कोमेजल्या फुलास मी

उत्स्फुर्तपणे फुलताना पाहिले

विझल्या दिव्याच्या ज्योतीस

प्रकाश देत तेवताना पाहिले

सुकल्या चेहर्‍यावर मी

अश्रू ओघळताना पाहिले

आटलेल्या नदीस मी

हुंदके देत रडताना पाहिले

स्वरांच्या संगतीविन सजलेले

सख्या रे संगीत पाहिले

स्मृतीरंगांत रंगून तुझ्या

आसवांना माझ्या रंगीत पाहिले

हृदयाची कवाडे क्रूरतेने

बंद करूनी पाहिले

विसरून तुला विश्वात माझ्या

मी विरुनी पाहिले

विरहाचे दुःख थोडेसे मी

तुझ्याही नयनात पाहिले

सत्यात सुटली सोबत जरी

महालास राजाराणीच्या मी स्वप्नात पाहिले

असहाय्यतेच्या धाग्याने स्वतःचे

ओठ मी शिवताना पाहिले

डोळ्यातले दिपक फुंकर मारून

स्वतःस मी विझवताना पाहिले

तुझ्या दिशेने येता येता

मजला मी दिशाहीन पाहिले

आशेत तुझ्या अस्वस्थ होता

मजला मी आशाहीन पाहिले

वाटेत तुझ्या वाट पाहत उभी

तू न एक नजर पाहिले

समुद्रास सुकवण्या आले जे

बुडताना मी ते पदर पाहिले...…!