महामेरू
महामेरू
राष्ट्रमाता मासाहेब जिजाऊ
गुणवंत, संस्कारी ज्ञानाची खाण ;
ध्येय बाळगूनी शिवा घडविला
दिले हिंदवी स्वराज्याचे दान .
थोर आपले शिवाजीराजे
अश्वावर होऊन स्वार ;
दुष्मनां निर्दालण्या
हाती धारदार तलवार .
स्वराज्याचा भगवा उंच
सह्याद्रीच्या शिखरी फडकला ;
घाव बसता शिवरायाचा
दुश्मन जिवानिशी तडफडला.
अफजलखानाचा कोथळा काढला
शाहिस्तेखानाची मोडली खोड ;
औरंगजेबास नमवणाऱ्या
शिवबास जगी नही तोड .
हिंदवी स्वराज्यासाठी जीवाची
बाजी लावून लढले ;
मर्द मावळ्यांच्या सोबतीने
शिवराय महामेरू झाले .
परस्त्रीला मातेसमान मानणारे
रणवीर शिवराय महान ;
गरीब, अनाथ प्रजेचे
शिवराय होते आशास्थान.
वर्णू किती शिवरायांची
ख्याती शब्दही अपुरे पडे ;
ऐसा झाला जिजाईसूत
ज्याच्यासाठी शत्रूही रडे .