Library
Profile
माणूस
माणूस
अंतर वाढतच चाललंय
माणसा माणसा मधलं
दरी रुंदावत चाललीये
खोल खोल
हाकेच्या अंतरावर असूनही
कधी ओळखता आल्या
नाही प्रियजनांच्या भावना
आधी मनाने मग शरीराने
निघून गेला खूप दूर दूर
स्वतःच्याच नादात
पोहत राहिला प्रवाहाबरोबर
निरंतर
ओढ नव्हती अस नाही
माणसाची माणसाला
पण गृहीत धरत राहिला
प्रत्येक नात्याला
वेळ काढला नाही
कधीच कुणासाठी
आता मात्र वेळच वेळ
आहे त्याच्यापाशी
पण......
नियतीलाच आता मंजूर नाही
माणसाला माणसाच्या
स्पर्शाची मुभा नाही
खळखळून मित्रांशी हसणं
अन नकळत हातावर टाळी देणं
ठरू लागलंय आता जीवघेणं
एक जादुकी झप्पी
मायेनं घेतलेली पप्पी
याची सर कशालाही नाही
मात्र साध्याश्या या गोष्टीलाही
मुकलाय माणूस
खूप गर्व होता
स्वतःच्या व्यक्तिस्वातंत्र्याचा
पण त्याचं स्वातंत्र्यासाठी
आज निसर्गापुढे झुकलाय माणूस
वाटतंय भविष्य अंधारात आहे
पण मनात आशा जिवंत आहेत
जर का या संकटातून
तरलाच माणूस
तर जन्माला येईल एक
वेगळाच माणूस
भावनांचं मोल आणि
अंतरीचे बोल
जाणणारा माणूस
प्रकृतीचा आदर करणारा माणूस
जीवाला जीव देणारा माणूस
सर्वांना आपलंसं करणारा माणूस
साधासुधा
बाहेरच्या झगमगटाला
न भुलणारा माणूस
स्वतःच्या घरात रमणारा माणूस
खरंच एवढं तरी शिकेल का
माणूस?
