माझी बाहुली ओळखेनाशी झालीय

आज माझी बाहुली मला ओळखेनाशी झालीय

मी तोच, तिच्यासंगे लपाछुपी खेळणारा

मी तोच, तिच्यासाठी कधी हत्ती कधी माकड बनणारा

आज तिच्या अनोळखी नजरांमुळे, छाती भरून आलीय ॥

आठवतंय तुला का? तो बांधलेला झुला

खिळा मारताना हात रक्ताळलेला

तू दुडूदुडू धावलीस लेप शोधण्यासाठी

तुझी ती तळमळ बघुनी, जखम जागीच लोपली ॥

तुला काय देऊ नि तुला कुठे ठेवू?

दिनरात होतो, मी मग्न विचारात

तू दृष्टी, तू सृष्टी या दिन नेत्रांची

काय अपराध घडला की पडलो अंधारात ॥

मी बाप की पाप?, हा प्रश्न आता पडतो

तुझ्या आठवणीने आता कंठही सुकतो

नको बाळा नको वागू अशी तू माझ्याशी

तुझ्या वाणीस हे कान तळमळलेले,

बोल "बाबा", ये जवळी उराशी

किती वाट पाहू, तो क्षण आतुरलेला

श्वास जड झाला आत्मा कोमेजलेला ॥