कविता येते जन्माला

अनुभव दाडतात हृदयी

आठवणींचा होतो पसारा

आवरताना हे सारे

कविता येते जन्माला

भावनांची रेलचेल येथे

विचारांचा असतो थाटमाट

परीस्थितीचे अवलोकन अन् 

शब्दांचा घातला जातो घाट

अलंकारांची चंगळ होते

यमकांची चालते मस्ती

व्याकरणाशी हुज्जत घालून

नियम दावे जबरदस्ती

बारीक सारीक घटना

काटेकोरपणे रचलेले

दुर्लक्षित क्षण कटाक्षाने

चपखलपणे रेखाटलेले

साहित्याची रसाळ गोडी

दिसते भाषेवरचे प्रभुत्व

भान हरपून लिहितो कवी

आकारास येते त्याचे कवित्व