कुलज्योती..

मुलगा वंशाचा "दिवा"

मुलगी आहे "पणती"..

मुलीच्या आगमनाने

क्रित्येक घरे उजळती..

        मुलगीच सौंदर्य घराचे

        करी उद्धार जगाचा..

         तरी जन्मता कन्या

        का हो सूर नाराजीचा..?

आजी-आजोबांची काठी

मुलगीच आधार कुळाचा..

घेई माघार प्रत्येकक्षणी

न मानता आपला-परका..

         आई-बाबांची परी

         आईचाच ती आरसा..

         संस्कार घेऊनी चालवी

         सासर-माहेरचा वारसा..

सारं काही कळूनही

दिव्यालाच झुकतं माप..

एका पणतीच्या माथी

का गौणत्वाचा अभिशाप..?

         मुलगा कुलदीपक असला तरी

         मुलगी असते "कुलज्योती"..

         दोन्ही घराचा वंश वाढवी

         म्हणूनच व्हावी लेकप्राप्ती..