Library
कृष्णामाई
कृष्णामाई
सांग ग माय आमचे काय चुकले
शेतात आलीस आनंदाने
आमचे पाय थरकले
रातीत तू उंब-यात आलीस
काळजाचे ग ठोके चुकले
सांग ना ग माय आमचे काय चुकले....
पोटाला ग चिमटा काढून
चार भिंती घर उभारले
घरभर फिरून रात्रभर तू
ग थैमान घातले
सांग ना ग माय आमचे काय चुकले.....🙏
संसाराला हातभार म्हणून
गोकुळ ग उभे केले
जीवाच्या आकांताने हांबरले
अन् पाण्यावर तरंगले
सांग ना ग माय आमचे काय चुकले..
दुदुदुडू धावणारे इवलेसे
पाऊल चिमुकले
काळजाच्या तुकड्यालाही तू
ग तुझ्या ओटीत घेतले
सांग ना ग माय आमचे काय चुकले..
धुऊन गेले गाव सारे
निःशब्द हुंदके एकवटले
दोष देऊ कुणाला काळीज
आता करपले
सांग ना ग माय आमचे काय चुकले...
सगळीकडे पाणी पाणी वेदनेचे हजार झरे पाझरले
कोंडले श्वास ,पिचलेली मन
एकांतात हरवले
सांग ना ग माय आमचे काय चुकले...
येतील मदती हजारो किरण
डोळ्यातील पाणी मी परतले
तुझ्यामुळे जातीधर्म विसरून
सारे एकत्र एकवटले
सांग ना ग माय आमचे काय चुकले...
जाता जाता आशीर्वाद ही
तूच दे ओठी शब्द थबकले
नाही मानली हार मी
स्वप्न उद्याचे गवसले
तरीही जाता जाता सांगून जा
सांग ना ग माय आमचे काय चुकले....
