जरा अधीर

का सांग आज माझा गेला असेल तोल

म्हणूनच तू अशी का झालीस गं अबोल?/धृ/

माऊ मुक्त कुंतलाच्या,

स्पर्शे सुखावलो मी.

म्हणूनच स्कंदी तुझिया,

थोडा विसावलो मी.

अपराध हाच माझा झालो जरा अधीर /१/

अधरावरिल हासू ,

पाहून भारलो मी.

त्या स्पर्शीण्या जरासा ,

थोडा धिटावलो मी .

अपराध हाच माझा झालो जरा अधीर /२/

पाहून सिंहकटिला ,

आधीर हात झाले .

घेण्या कवेत तिजला ,

सहजी पुढे निघाले.

अपराध हाच माझा झालो जरा अधीर/३/

गाली गुलाब फुलला ,

रंगून त्यात गेलो .

अन् हुंगण्या तयाला ,

थोडा अधिक झुकलो .

अपराध हाच माझा झालो जरा अधीर/४/

सारे तुझे तरीही ,

माझेच भासताहे .

माझे मला मिळावे ,

हा ध्यास मात्र आहे .

अपराध हाच माझा झालो जरा अधीर/५/

म्हणूनच तू असे का झालीस ग अबोल 

का सांग आज माझा गेला असेल तोल/धृ/