एक होतं छोटसं राज्य

एक होतं अगदी छोटसं राज्य

निसर्गाच्या कुशीत ते वसलेलं

एका बाजूला समुद्र असलेलं

तीन बाजूंनी डोंगरांनी वेढलेलं

उपजीविकेसाठी मासेमारी

गृहउद्योग आणि शेती करणारं

मर्यादीत साधन संपत्ती असूनही

अती सुखा समाधानात नांदणारं

एकदा राजाच्या मनात विचार आला

सांगण्यासाठी त्याने दरबार बोलवला

राज्यात सर्वत्र पर्यटन व्यवसाय वाढवून

राज्याचा सर्वांगीण विकास ठरवला

जरी जुने जाणते सरदार आणि

ज्येष्ठ नागरिकांनी विरोध केला

हांजी हांजी करणाऱ्या मंत्र्यांनी

राजाच्या सुरात सूर मिसळला

रस्त्याच्या कामासाठी बंदर आले

पर्यटनासाठी वाहतूक आली

वाहतूकीसाठी वाहने रस्ते आले

रहाण्यासाठी हाॅटेल, दुकाने झाली

यासाठी डोंगर शहीद झाले

पोटातून वाहने घेऊन चालले

अंगाखांद्यावर ईमारती झेलून

सगळीच शक्ती हरवून बसले

असलेल्या निसर्गाची भूरळ पडून

परराज्यातून पर्यटक वर्दळ वाढली

नव्या सोयी सुविधेची गरज वाढली

अजून हजारो वृक्षांची कत्तल झाली

आज दोन तपांनी अतिश्रीमंत राज्य

अमावस्येच्या रात्रीही चकाकत असते

यःकश्चित निर्धन निसर्गसंपन्न राज्यांचा

फुकाचा नसणाराआदर्श बनून मिरवते

चार तपांनी सर्वत्र उद्योग आले आहेत

दळणवळणात उच्च स्थान प्राप्त आहे

परराज्यातील लोकांना नोकर्‍या देऊन

गरीबी, बेकारी, दारिद्र्य वाढतेच आहे

पाच तप पुरेशी झाली या राज्याला

निसर्ग संपन्न हसते खेळते राज्य

पूर्णपणे प्रदूषणयुक्त होण्यासाठी

आनंद घालवून भकास होण्यासाठी

एक होतं कधीकाळचं छोटसं राज्य

निसर्ग कुशीतून केव्हाचच निघालेलं

एका बाजूला प्रदुषित समुद्र असलेलं

नऊ बाजूंनी पर्यावरणाची हानी झालेलं