दिवा

नाही विसरली कधी

सूर्य देवा तुला आई.

तिच्या दुःखाचा विसर

तुझ्या प्रकाशाच्या ठायी.

तू पेरीत प्रकाश

वर डोकावून येतो.

माझ्या आईच्या हातात

देवा तुझा भास होतो.

तुझे हसणे हसणे

तिच्या ललाटाची रेषा

हात जोडून सांगते.

यावे यावे माझ्या देशा

तुझा पाहुणा प्रकाश

माझं अंगण उजाळी.

मग आईच्या शब्दात

काय येतसे झलाळी.

झुंजूमुंजू सारे होता

आई गहीवरून येते.

तुझे स्वागत करण्या,

आई पहाटच होते.