भार
भार
1 min
330
झाले नशीब बैमान
आली डोक्यावर मोळी
किती कष्टलो झुंजलो
तरी रिती रिती झोळी
काल अंधारात होतो
आज आमुशा दारात
किती जखमा पोसल्या
कशा सांडल्या उरात
जरी राबतो कष्टतो
तरी संकटे आमाप
चंद्रमौळी झोपडीला
असे काळोखाचा शाप
माझ्या घामाच्या धारांनी
डोले कपाशीचे बोंड
आली आवसं आसवं
तिचे काळे काळे तोंड
किती काळोखाच्या राशी
झोपडीच्या झापाआड
किती उपाशी तापाशी
दिसं सरले आपार
काय भयानं काळोख
कसा पेटवावा दिवा
लेक उपाशी झोपली
घोर लागलाया जीवा
आता नाही सोसवत
खांद्यावर असा भार
धाड यमा तुझा रेडा
होतो त्यावर मी स्वार