चारूगात्री

इथे शांत एकांत, ये चारूगात्री,

तुझ्या दर्शना, थांबला एक यात्री || धृ. ||

कुणी घातली साद, ऐकून जाग,

धुळीसारखी, प्रीत तुडवू नको गं,

किती रंगवू नाट्य, मी एकपात्री || १ ||

तुझ्या आठवांनीच, कोकिळ गाते,

नभी चांदणे, ऐन रंगात येते,

फुलावे असे रोज रोमांच गात्री || २ ||

तुझ्या पैंजणांना, असे दुष्ट छंद,

छळावे, जुळावे परि प्रीतीबंध,

भिजे आसवांनी, नभी चांदरात्री || ३ ||

पहा पाकळ्यांचा, सडा शिंपीला मी,

तुझ्या स्वागताला, कधीचा खडा मी,

आता जाऊ दे, भेट स्वप्नांत रात्री || ४ ||

पुन्हा भेट, वा काही भेटू नको गं,

नजर भेटीची, वाट अडवू नको गं,

सखे दान देऊन, जा तू सपात्री || ५ ||