*आली दिवाळी आली*

पहा थांबल्या अमृतधारा 

शांत जाहला वादळवारा

गजबजला ओसाड किनारा

घराघरातून आता उजळतील लक्षदीप माला 

आला दिवाळीचा सण आला

गच्च पिकातून मोती भरले 

आनंदाचे क्षण मोहरले

शरदाचे नवरूप बहरले 

पहाट वारा चैतन्याची शीळ घुमवू लागला 

आला दिवाळीचा सण आला

शाळांनाही सुट्ट्या लागल्या

मौज मस्तीच्या लाटा उठल्या

सुगंधी स्नाने अंगत पंगत रंगत चढे फराळाला 

आला दिवाळीचा सण आला

अंधाराची सोडून सोबत 

करू प्रकाशाचे सुस्वागत 

कुणी न राही दुःखित वंचित

जनसेवेचे व्रत आचरती वंदू तयाना चला 

आला दिवाळीचा सण आला