बालगीत (माझे सखेसोबती)

कावळे दादा कावळे दादा

काळा रंग तुझा किती घट्ट

खारू ताई बघ हासली

सरसर चढे डोळे केले मिट्ट ||

पोपट काका पोपट काका

हिरवा रंग तुझा किती छान

मिरची ताई बघ लपली

पानातुन पाहे उंचावून मान ||

उंदीर मामा उंदीर मामा

पांढरा रंग दिसे दातांचा

मनीमाऊ हळूच का दबकली

गोंडस दिसे फुगा शेपटीचा ||

मैना मावशी मैना मावशी

टिपले दाणे गाणे गाऊन

लाल रंग भरून डोळ्यात

सकळ ऐकती लावून कान ||

दादा काका मामा मावशी

सारे माझे हे सखेसोबती

काळा हिरवा लाल पांढरा

रंगात वाटे मौज किती ||